तराई/मधेसमा खानेपानी र सिँचाइ समस्या हल गर्न सरकारको ध्यानाकर्षण
तराई/मधेसमा खानेपानी र सिँचाइ समस्या हल गर्न सरकारको ध्यानाकर्षण
काठमाडौँ, ३० असारः प्रतिनिधिसभाको आजको बैठकको शून्य समयमा सांसदहरुले तराई÷मधेसका क्षेत्रमा बढ्दो खानेपानी र सिँचाइको समस्या समाधान गर्न सरकारको ध्यानाकर्षण गराउनुभएको छ । उहाँहरुले चुरे संरक्षण, तराई÷मधेसमा पानी पुनःभरणको योजना बनाउन तथा किसानलाई मलबिउ उपलब्ध गराउन तथा प्राकृतिक विपत्तिबाट नागरिकको जीउधनको रक्षा गर्न माग गर्नुभयो ।
सांसद जुलीकुमारी महासेठले मधेस प्रदेशमा पानीको अभाव अन्त्य गर्न विशेष योजना बनाउन सरकारको ध्यानाकर्षण गराउनुभयो । सांसद अनिता देवीले सिँचाइको पर्याप्त सुविधा नहुँदा तराई÷मधेसका क्षेत्रमा धान रोपाइँ हुन नसकेकाले सो क्षेत्रलाई सुक्खा क्षेत्र घोषणा गरी किसानलाई उचित राहतको व्यवस्था गर्न माग गर्नुभयो ।
सांसद उर्मिला माझीले तराई÷मधेसका क्षेत्रमा देखिएको खानेपानीको समस्या समाधान गर्न सरकारको ध्यानाकर्षण गराउनुभयो । सांसद कालुराम राईले चुरे संरक्षण गरेर मात्रै पहाड र तराई क्षेत्रमा भू–क्षय नियन्त्रण र पानीको अभाव अन्त्य गर्न सकिने जनाउँदै पानीको पुनःभरण योजना बनाउन आग्रह गर्नुभयो ।
सांसद अर्जुननरसिंह केसीले वर्तमान सरकार गठनको एक वर्ष बितिसक्दा पनि सम्झौतामा उल्लेख भएअनुसार संविधान संशोधनको प्रक्रिया अघि बढ्न नसक्नु ‘जनतासँग गरेका प्रतिबद्धताप्रतिको धोका र सरकारको असफलता’ भएको टिप्पणी गर्नुभयो । सांसद छिरिङ ल्हामु लामा तामाङले वर्तमान सरकार गठनको हुँदाका बखत संसद्मा गरिएको प्रतिबद्धता पूरा गर्न नसकी आफ्नो औचित्य गुमाइसकेको आरोप लगाउनुभयो ।
सांसद अन्जनी श्रेष्ठले पशुपतिको पूजाआजामा चर्को मूल्य लिने तथा किरियापुत्री भवनमा न्यूनतम सुविधा पनि नभएकाले सो समस्या समाधान गर्न सरकारको ध्यानाकर्षण गराउनुभयो ।
सांसद अनमनलाल मोदीले स्वास्थ्य बीमाअन्तर्गत कोशीका ठूला अस्पताललाई प्रथम सेवा बिन्दुबाट हटाएर जनतालाई सास्ती दिने काम नगर्न सरकारलाई सुझाव दिनुभयो । अस्माकुमारी चौधरीले स्वास्थ्य बीमा कार्यक्रमअन्तर्गत राप्ती स्वास्थ्य विज्ञान प्रतिष्ठानलाई ‘रेफरल सेन्टर’का रुपमा राखिँदा यसबाट नागरिकलाई स्वास्थ्योपचारलाई झन् जटिल भएको बताउनुभयो ।
सांसद अम्मरबहादुर थापाले प्राकृतिक विपत्तिको जोखिममा रहेका नागरिकको जीउधनको रक्षा गर्न सरकारको ध्यानाकर्षण गराउनुभयो । सांसद अमरेशकुमार सिंहले काठमाडौँ महानगरपालिका क्षेत्रभित्र कबाड व्यवसायीमाथि भएको धरपकड नियन्त्रण गर्न सङ्घीय सरकारको ध्यानाकर्षण गराउनुभयो ।
सांसद ईश्वरबहादुर रिजालले पर्यटकीय क्षेत्र दोलखाको जिरी क्षेत्रमा पर्यटन पूर्वाधार निर्माणका लागि सङ्घीय सरकारबाट जग्गा प्राप्तिको विषय टुङ्ग्याइदिन आग्रह गर्नुभयो । सांसद ईश्वरी घर्तीले रोल्पाको भौतिक र शैक्षिक विकासमा विशिष्ट योगदान दिनुभएका राप्रपा नेता बालाराम घर्ती मगरप्रति श्रद्धाञ्जली अर्पण गर्दै उहाँको योगदान रोल्पाली जनताले स्मरण गरिरहने बताउनुभयो ।
सांसद कल्पना चौधरीले भिजिट भिसा प्रकरणमा कहीँकतै संलग्न नभएका गृहमन्त्रीलाई प्रतिपक्षी दलले जबर्जस्ती मानवतस्करी करार गर्न खोजिरहेको भनी आपत्ति जनाउनुभयो । ईश्वरीदेवी न्यौपानेले संसद्लाई दोषरोपण गर्ने थलोका रुपमा सीमित गर्न नहुनेमा जोड दिनुभयो ।
सांसद किरणकुमार साहले सङ्घीय मामिला तथा सामान्य प्रशासन मन्त्रीको लेनदेनसम्बन्धी विषयका बारेमा सदनलाई जानकारी गराउन माग गर्नुभयो । सांसद गोकुलप्रसाद बास्कोटाले काभ्रेका नागीडाँडामा विमानस्थल निर्माणको विषय कता हरायो ? भनी प्रश्न गर्नुभयो ।
सांसद गङ्गा कार्कीले खेतीयोग्य समयमा मलको अभाव हुनु लज्जास्पद भएको जनाउँदै संसद्मा उठेका विषयको सम्बोधनमा सरकारले ध्यान नदिएको बताउनुभयो । सांसद चन्द्रकान्त भण्डारीले संसद्लाई समस्याको समाधानको थलोका रुपमा विकास गर्नुपर्नेमा जोड दिँदै संसद् भवनमा समाचार सङ्कलनमा खटिने पत्रकार र सुरक्षाकर्मीलाई उपयुक्त प्रबन्ध गर्न माग गर्नुभयो ।
सांसद चन्द्रबहादुर विश्वकर्माले गरिबी निवारण नेताका भाषण, नीति तथा कार्यक्रममा भए पनि गरिबी निवराणको योजना बनाउन सरकार चुकेको बतानुभयो । छिरिङ डम्डुल लामा भोटेले हुम्लालाई केन्द्रबिन्दु बनाएर लुम्बिनी, काक्रेबिहार हुँदै मानसरोबरसम्म जाने धार्मिक तथा पर्यापर्यटनको विकास गर्न सरकारको ध्यानाकर्षण गराउनुभयो ।
सांसद जनार्दन शर्माले छाउपडीका नाममा किशोरी र महिलाले ज्यान गुमाउनुपर्ने अवस्थाको अन्त्य कसरी र कहिले गर्ने भनी ? सरकारसँग प्रश्न गर्नुभयो । सांसद कान्तिका सेजुवालले छाउपडी गोठमा विभिन्न कारणबाट महिलाले ज्यान गुमाउनुपर्ने अवस्थाको अन्त्य गर्न सरकारको ध्यानाकर्षण गराउनुभयो । सांसद अब्दुल खाँनले महिला हिंसाका घटना न्यूनीकरण गर्न विशेष योजना सञ्चालन गर्न सरकारसँग माग गर्नुभयो ।
