सिरहा, २७ जेठ : यहाँस्थित लहान बजारमा बिक्रीका लागि राखिएका आँप विषादीरहित पाइएको छ ।

आज बजार अनुगमनका क्रममा यहाँका पूर्वपश्चिम राजमार्गअन्तर्गत पर्ने १० वटा फलफूल पसलमा अनुगमन गर्दा व्यापारीले आँप पकाउनका लागि मानव स्वास्थ्यलाई असर गर्ने हानिकारक विषादीको प्रयोग नगरेको पाइएको हो ।

इलाका प्रशासन कार्यालय लहान, खाद्य प्रविधि तथा गुण नियन्त्रण डिभिजन कार्यालय राजविराज, लहान नगरपालिका कृषि विकास शाखा, सुरक्षाकर्मी तथा पत्रकार सम्मिलित टोलीले संयुक्त रुपमा अनुगमन गरेका थिए । अनुगमनमा आँप पकाउन प्रतिबन्धित ‘क्याल्सियम कार्बाइड’ प्रयोग गरेको नभेटिएको खाद्य प्रविधि तथा गुण नियन्त्रण डिभिजन कार्यालय राजविराजका खाद्य निरीक्षण अधिकारी राजिन बुढाथोकीले बताउनुभयो ।

“बजारमा मानव स्वास्थ्यलाई तत्काल असर गर्ने प्रतिबन्धित ग्याँस प्रयोगमार्फत फलफूल पकाएर गरिने बिक्रीलाई निरुत्साहित गर्ने उद्देश्यले बजार अनुगमन गरिएको थियो । तर, मानव स्वास्थ्यका लागि हानिकारक मानिने क्याल्सियम कार्बाइड प्रयोग गरेको पाइएन”, खाद्य निरीक्षक बुढाथोकीले भन्नुभयो ।

सिरहालाई आँपको राजधानी मानिन्छ । लहान नगरपालिकाका प्रमुख प्रशासकीय अधिकृत सन्तोष रायका अनुसार स्थानीय उत्पादनलाई प्रवर्द्धन र किसानलाई प्रोत्साहन गर्ने उद्देश्यले नगरपालिकाले बर्सेनि यहाँ उत्पादित आँपको ‘ब्राण्डिङ’ गर्ने गरेको छ । गत वर्ष ५० मेट्रिक टन बढी मालदह आँप ब्राण्डिङ गरी काठमाडौँलगायत देशका विभिन्न सहरमा बिक्री वितरण गरेको नगरपालिकाको कृषि शाखाले जनाएको छ । यस वर्ष पनि उक्त कार्यलाई निरन्तरता दिने कृषि शाखाका संयोजक बद्रीनारायण चौधरीले जानकारी दिनुभयो ।

उहाँका अनुसार असारको पहिलो सातादेखि मालदह आँप बजारमा आउन थाल्ने भएकाले सोहीअनुरुप सङ्कलन गरी पठाउन तयारी गरिएको छ । लहानको वडा नम्बर १२, १३, १४, १५, १८, १९, २३ र २४ लाई आँपको पकेट क्षेत्र मानिन्छ ।