काठमाडौँ, ३२ असार : पूर्वराष्ट्रपति विद्यादेवी भण्डारीले नेकपा (एमाले)को विधान महाधिवेशनमा आफ्नो भूमिकाबारे पार्टीको केन्द्रीय कमिटी बैठकले निर्धारण गर्ने बताउनुभएको छ ।

मदन भण्डारी फाउण्डेशनले आयोजना गरेको पत्रकार सम्मेलनमा आफू एमाले पार्टीको सक्रिय राजनीतिकमा क्रियाशील भइसकेकाले विधान महाधिवेशनमा सहभागी हुने कुरा केन्द्रीय कमिटी बैठकले तय गर्ने बताउनुभयो ।

“पार्टीभित्रको कुन संरचनामा के भूमिका हुने भन्ने कुरा पार्टीको माथिल्लो तहको नेतृत्वले तय गर्ने छ । महाधिवेशन नहुँदाको अवस्थामा केन्द्रीय कमिटी नै सर्वोच्च अङ्ग हुन्छ”, उहाँले भन्नुभयो, “विधान महाधिवेशनमा मेरा उपस्थिति कसरी गराउनहुन्छ भन्ने कुरा केन्द्रीय कमिटीमा नै भरपर्ने कुरा हो । प्रतिनिधिका रूपमा हुन्छ वा आमन्त्रित सदस्यको रूपमा कसरी गराउनुहुन्छ यसमा मेरो कुनै यस्तो यही गर्नुपर्छ भन्ने छैन ।”

जबजको विजारोपण सुदृढीकरण र त्यसलाई सिद्धान्तलाई अगाडि बढाउने कुरा मदन भण्डारीले गरे पनि रहस्यम निधन भएकाले लागू गर्न नपाएको उल्लेख गर्दै उहाँले भन्नुभयो, “तर, पनि पार्टी अगाडि बढ्यो । पार्टीले आफ्नो सिद्धान्तअनुसार अगाडि बढ्दै जाँदा यो ठाउँसम्म आइपुगेको छ ।” उहाँले पार्टी जनताको तहमा काम गरेअनुसार विधान महाधिवेशनमा प्रतिनिधित्वको सहभागी हुनुपर्नेमा बताउनुभयो ।

पूर्वराष्ट्रपति भण्डारीले संसद् विघटन संविधानअनुसार नै तत्कालीन मन्त्रिपरिषद् बैठकले गरेको निर्णयको आधारलाई कार्यान्वयन गरेको बताउनुभयो ।

फाउण्डेशनका अध्यक्ष भण्डारीले मदन भण्डारीप्रति सच्चा सम्मान गर्न, एमाले पार्टीको सङ्गठन र जबज विस्तारको माध्यम जन्मजयन्ती हुने बताउनुभयो । उहाँका अनुसार जन्मजयन्ती २०८२ र २०८३ सालभरि विचार गोष्ठी, छलफल तथा अन्तरक्रिया, कविता, वादविवाद, हाजिरीजवाफ, खेलकुद प्रतियोगिता, सांस्कृतिक कार्यक्रम, पुस्तक प्रदर्शनी लगायतका क्रियाकलाप गरी देशभरि नै मनाइने छ । जन्मजयन्तीको समापन समीक्षासहित २०८४ सालमा गरिनेछ ।

मदन भण्डारीको ७५ औँ जन्मजयन्ती मनाउन समिति गठन

जननेता मदन भण्डारीको ७५ औँ जन्मजयन्ती मनाउनका लागि बागमती प्रदेशका पूर्वमुख्यमन्त्री डोरमणि पौडेलको संयोजकत्वमा ७५ सदस्यीय मूल व्यवस्थापनि समिति गठन गरिएको छ ।

फाउण्डेशनका अध्यक्ष उषाकिरण भण्डारीका अनुसार जनताको बहुदलीय जनवाद (जबज) का विषयमा टोलटोलसम्म जानकारी गराउनका लागि गठित समितिको सहसंयोजकमा सुशील प्याकुरेल, प्रा डा गणेशमान गुरुङ र सचिवमा डा भेषराज अधिकारी रहनुभएको छ ।