कञ्चनपुर, २४ असारः जिल्लाको लालझाडी गाउँपालिका–५ स्थित देखतभूली स्वास्थ्य चौकी लाई पोषणमैत्री स्वास्थ्य संस्था घोषणा गरिएको छ । एक औपचारिक समारोहका बीच गाउँपालिकाका अध्यक्ष निर्मल रानाले स्वास्थ्य चौकीलाई पोषणमैत्री संस्था घोषणा गर्नुभएको हो ।

घोषणा कार्यक्रममा उहाँले देखतभूली स्वास्थ्य चौकी उदाहरणीय संस्था बनेको उल्लेख गर्दै यसलाई अझै सुदृढ बनाएर लैजाने बताउनुभयो । उहाँका अनुसार स्वास्थ्य चौकीले पोषणमैत्री स्वास्थ्य संस्था बन्नका लागि आवश्यक सबै मापदण्ड तथा १६ वटा सूचकमा सतप्रतिशत नतिजा हासिल गरेपछि यो घोषणा गरिएको हो ।

स्वास्थ्य चौकी प्रमुख लीलाकान्त झाका अनुसार स्वास्थ्य संस्था पोषणमैत्री घोषित हुन दुई चरणको मूल्याङ्कन प्रक्रिया पार गर्नुपर्ने हुन्छ । अनिवार्य मापदण्ड पूरा गरेपछि पोषण सेवासँग सम्बन्धित सूचकमा पनि मूल्याङ्कन गरिन्छ । पोषण सेवा सुधार निर्देशिका, २०७८ अनुसार गठित पोषण सेवा सुधार समितिको बैठक र गुणस्तर सुनिश्चिता कार्यसमितिको प्रमाणीकरणपश्चात् पोषणमैत्री स्वास्थ्य संस्था घोषणा गरिएको उहाँले बताउनुभयो ।

कार्यक्रममा पोषण फाँटका प्रमुख मञ्जुकुमारी कार्की र स्वास्थ्य चौकी प्रमुख झालाई कार्यक्रमका प्रमुख अतिथि गाउँपालिकाका अध्यक्ष निर्मल रानाले सम्मान गर्नुभएको थियो । साथै, सोही अवसरमा स्वास्थ्य चौकीलाई पोषणमैत्री संस्था प्रमाणपत्र प्रदान गरिएको थियो ।

स्वास्थ्य चौकी प्रमुख झाले गर्भवती, सुत्केरी र शिशुहरूको पोषणस्थिति सुधार गर्न प्रभावकारी काम गर्दै आएको र आगामी दिनमा अझ गुणस्तरीय सेवा प्रदान गर्ने प्रतिबद्धता गर्नुभएको थियो ।